Ku : M Fadhil
“Aa, engkin uihna langsung ka réstoran anu biasa, nya. Diantos ku abdi sareng Umi,” ceuk Velin nga-WA kuring.
“Muhun, Néng.” bales Kuring.
Alhamdulillah Velin inget waé kana tanggal kalahiran Kuring, geus jadi kabiasaan lamun Kuring, Velin atawa Umi ulang taun sok ngahaja dahar di réstoran. Keun waé sataun sakali itung-itung syukuran ka Alloh, sabab loba pisan jelema anu poho kana nikmat anu dua, nyaéta nikmat waktu jeung nikmat sehat.
Nepi ka réstoran geus nyampak Velin jeung Umi keur nungguan. Taya acara tiup lilin, ngan saukur ngadoa ka Nu Kawasa, syukuran kana nikmat anu parantos dipaparin.
“Aa, palay kado naon ti Abdi?” ceuk Velin nanya ka Kuring.
“Ah, teu hoyong kado naon-naon, Néng, cekap, malihan tos langkung-langkung pangabaktos sareng kanyaah salira gé ka Aa salami ieu. Hatur nuhun pisan, Néng,” ceuk Kuring.
“Kadona ieu wé nya, A!” ceuk Velin bari ngasongkeun amplop.
Amplop ditampa, tapi teu kateguh naon eusina, piraku ari duit atawa tiket nonton konsér slank mah da asa teu mungkin.
Panasaran, tuluy ku Kuring dibuka, bréh katempo alat tés kehamilan atawa téspék anu aya setrip dua… positif hamil.
“Allohuakbar…, Alhamdulilah…!” Kuring ngarangkul Velin bari ceurik. Teu disangka-sangka kado Velin dina ulang taun kuring nu ayeuna, kado pangéndahna anu kungsi katampa ku Kuring, sanggeus ampir salapan taun rumah tangga. Ayeuna Alloh maparinan rizki anu geus jadi impian salila ieu, kabgjaan anu dipénta-pénta. Teu panasaran hasil beurang peuting teu weleh ngadu’a jeung usaha. Nyata Alloh mah Maha Welas, Maha Asih ka umatna anu teu bosen-bosen ibadah. Tétéla ari hasil mah moal ingkar tina usaha urang. Umi ogé teu tinggaleun, kacida bungahna nyaksian kado ti Velin. Velin ditangkeup bari diciuman ku Umi anu milu bungah jeung bagja bakal datang calon putu anu dianti-anti.
“Alhamdulillah, dina umur Umi anu geus sakieu cueutna, Gusti Alloh maparinan kénéh waktu pikeun Umi ngawujudkeun kahayang nyaéta mangku incu.” saur Umi.
*
Teu sirikna kawas jadi ratu Velin kakandungan téh, kana baranggawé sagala dicaram. Bakat ku nyaah, ahirna Kuring ngahaja ngayaan nu babantu di imah. Tugasna migawé sakabeh pagawéan rumahtangga. Sanajan sok rajeun Velin ogé mantuan, da teu puguh cicing waé ari tuman baranggawé mah, cenah. Teu poho kontrol jeung konsultasi ka dokter kandungan, ngarah sagalana lancar jeung teu aya masalah.
Alhamdulillah, di taun ka sapuluh, di tengah bulan ka opat, lahir ogé anu diarep-arep teh, orok anu geulis lir putri. Budak anu karék gumelar téh dibéré ngaran Tiara. Tiara anu dipikacinta ku sakabéh kulawarga, anu dianti-anti ayana beuki nyampurnakeun rumah tangga kuring. Asa beuki sampurna deuih kuring salaku lalaki sabab geus jadi bapa.
Alhamdulillah hirobill alamiin yaa Alloh, syukur kana sadayana rejeki anu katampi.
*
Umi anu pangsibukna jeung pangnyaahna ka Tiara, incu anu ditutungguan. Kawas anu boga emas sagedé gunung, Umi agul boga incu anu lucu. Umi anu pangbawélna jeung pangmelangna lamun Tiara harééng atawa gering. Sakapeung sok riweuh kudu buru-buru dibawa ka bidan atawa ka dokter anak. Kitu ogé dina pangabutuh keur orok kayaning popok, talek, minyak telon, nepi ka baju orok ampir kabéh dipangmeulikeun ku Umi. Teu beunang diulah-ulah sanajan kagaduhna ukur ngandelkeun tina gaji pangsiunan Almarhum Abi. Umi mah sagala bru-bro ka tiara ogé ka Velin.
*
Dua taun kuring boga anak anu lucu jeung pinter, tapi asa aya anu ngurangan kabungah haté téh. Velin sok mindeng ngajauhan, nyingkahan kuring. Leuwih loba ngoprék hapé, sakapeung lamun ditanya téh némbalna sok teu nyambung. Hapéna osok di-mode-senyap-keun.
“kunaon atuh, Velin?” gerentes Kuring dina jero haté.
(nyambung)
