Reka Carita ku : M Fadhil
Alhamdulillah sanggeus ditarima ku Velin, hirup kuring jadi pinuh ku kabungah
Asa kaubaran deui, raheut hate anu pernah kaalaman baheula ku Rianti.
Kitu oge Velin, beuki nyaah ka kuring beuki raket, da karak saumur hirupna muka hate ka lalaki
Velin ku kuring dititipkeun gawé di hiji perusahaan klien perusahaan kuring
teu jadi OG deui,
meunang posisi anu rada lumayan, teu cape teuing kawas baheula jadi OG
puguh we mamang jeung bibi nage bungah kacida jeung nganuhunkeun na ka kuring
**
Assalamualaikum…Umi kumaha damang ? ceuk kuring barang narima telepon ti Umi
Alhamdulillah sae, kumaha ujang sawangsulna? ceuk umi malik nanya
Alhamdulillah abdi oge sae umi, tembal kuring
Fadhil..mun tiasa kin upami libur, uih heula kadieu nya, umi boga kabar hade keur hidep, ceuk Umi sorana kadéngé bungah.
Inshaa Alloh Umi, aya naon umi ? ceuk kuring panasaran
Apal keneh teu ka shinta, anak na pa Ustadz Ayub tea ?
ceuk umi nanya.
Muhun kumaha kitu Umi? kuring malik nanya.
Shinta teh ayeuna geus beres masantren na jang, geus dewasa, jaba geulis pisan, cocoklah pokonamah jeung ujang, ceuk indung kuring bari ditungtungan ku seuri.
Aduh hapunten Umi, sanes abdi teu hoyong, namung ayeuna mah abdi tos gaduh calon pilihan nyalira, tembal kuring
Bener eta téh jang? kadieu atuh bawa kenalkeun ka umi, Ari ujang cocok mah geus tong lila teuing lah, langsung nikah we, umi geus teu sabar hayang ngais incu, ceuk umi sumanget.
Muhun leres atuh umi, Inshaa Alloh kin minggu ku abdi dikenalkeun ka umi, ceuk kuring yakin.
Nya atuh ditungguan ku umi nya, ke umi rek masak nu ngeunah keur calon mantu umi, ceuk Umi
Muhun Umi, wios atuh teu kedah ngarepotkeun, ceuk kuring deui
keun wae atuh jang, ari keur tamu spesial mah, pasakan nage kudu spesial, ceuk umi nutup obrolan.
Alhamdulillah hirobill allamin Ya Alloh, mugi sing dilancarkeun sadayana pamaksadan abdi.
*
Waktu kuring ngabejakeun boga maksud rek ngawawuhkeun velin ka umi, alhamdulillah mamang jeung bibi Velin milu bungah jeung mere ijin, ka kuring mawa Velin nepungan Umi
A.. umi bakal nampi abdi teu? ceuk Velin waktu di perjalanan ka imah Umi
Pasti atuh nenk, tenang we umi mah bageur, pasti bingaheun pisan, bakal enggal gaduh mantu, ceuk kuring ngagonjak Velin
Ah ..Aa mah, inggis we kitu a, bilih teu cocok ka abdi, ceuk Velin bingung
Pasti cocok atuh nénk, piraku we bakal gaduh mantu sakieu geulisna, ceuk kuring ngarayu Velin
Velin nyiwit cangkéng kuring, bari imut manis, ngabeureuman pipina dirayu ku kuring.
Assalamualaikum… ceuk Velin barang geus aya dihareupeun umi..
waalaikumsallam, ceuk umi, bari nampanan velin salim, tuluy duanana silih rangkul
Oh ieu calon mantu umi teh, meni geulis ceuk umi, muji Velin
Ah..umi tiasa wae, hatur nuhun, velin semu era
Ari ibu rama, masih nyondong nenk? ceuk umi muka obrolan
Emmmhh… Rama abdimah parantos ngantunkeun…ceuk Velin
Inalillahi waina.Inalillahi rojiun, duh hapunten atuh nenk, ceuk umi reuwas
Teu sawios umi, velin tungkul sedih
Ari nénk kawit timana ? ceuk umi nanya deui..
Emmmhh…abdi…Emmmhh…abdi ti alit ngiring sareng mamang janten hilap deui lembur abdi, ceuk Velin bangun nu bingung
Ooh, umi teu neruskeun omongan na
jempling nu aya, teu aya obrolan deui, kaayaan asa teu kawas anu diharepkeun ku kuring, Asa kaku jeung genaheun.
Sok atuh geura taruang heula, punten nya umi bade ka madrasah heula, ceuk umi muyarkeun lamunan kabehan, jelas pisan katempo umi teu satuju kuring ka velin ku cara na ninggalkeun tamu, bari alesan rek ka madrasah sagala
Muhun mangga umi, ceuk velin laun
kuring neuteup umi nu sarua keur neuteup kuring, aya rasa teu suka ku datang na velin kabaca tina sorot mata umi, nu teu mere budi Alus ka velin..
*
Saur abdi ge naon A, umi moal nampi abdi… ceuk Velin ceurik dina mobil, waktu balikeun ti imah umi
Ah teu nenk, etamah raraosan nenk we, ceuk kuring ngupahan
A abdi sanes murangkalih anu gampil di bohongan A…ceuk velin bari segruk ceurik
Nenk, umi pasti satuju nenk, ceuk kuring bingung
Abdi ge tos yakin ti awal bakal kieu, ceuk velin satengah ngajerit
nénk sabar nenk..ceuk kuring, bari nyisiken mobil da geus deukeut ka gang imah Velin
punten A, wayah na ti ayeuna, abdi nyuhunkeun tulung ka Aa,, tong mendakan abdi deui, ceuk velin bari ramisak
Nenk nyarios naon sih ..? ceuk kuring reuwas
punten a ..ti samet ayeuna urang…Putus ..!! ceuk velin bari muka panto mobil, tuluy lumpat bari ceurik ka jero gang ka imahna
Veliiinnn….veliiiinnn…
kuring gegeroan teu di palire.
– Hanca-
