Ku : Kang Maman Soljer
Nu burut pama nguliat
Semu hérang tinggarurat
Dicabut ku malaikat
Tangtu urang téh sakarat
Rada sereg ngambay parat
Cirina bakat ku beurat
Nyawa ngangsreg mapay urat
Nyerina kaliwat-liwat
Budak nempo nu ngabudah
Pajarkeun basa keur ojah
Béak témpo kudu pindah
Nyampeurkeun ka alam barjah
Ngabatu saban ngajulur
Mudugdug saban rék nyembur
Geus waktu ninggalkeun lembur
Ngajugjug ka alam kubur
Katingali kos tikukur
Mun ditéwak sok ngabanjur
Meunang ngali geus diukur
Mahi keur awak sakujur
Mun ocon henteu kawawa
Mun dicoba ngabedega
Rék naon anu dibawa
Duit loba sawah lega
Hayang ngancul-ngancul heula
Nyobaan kudu nyangsaya
Meunang ngumpul-ngumpul téa
Bélaan nafsu paséa
Hérang ngabentuk melendung
Mun dipoé beuki kembung
Meunang tisruksruk tidungdung
Nu sok dipaké anigung
Pama cengkat osok nangtung
Tangtu cengkatna rék nyambung
Kana solat mabok linglung
Waktu jakatna gé embung
Samalah sok mébér laér
Ni siga pamulu jawér
Ibadah katolér-tolér
Nepi ka nyanghulu ngalér
Tadi mah dicoér-coér
Diilik ni beuki laér
Ditengah imah ngagolér
Nu ceurik teu daék palér
Nu mologong ni buluan
Disarung teu katutupan
Ngajolopong diruruban
Diriung ditarungguan
Sakadar hayang nyasaran
Karasa euyak meueusan
Lagadar datang pasaran
Henteu bisa nolak pisan
Mun dianggé jadi linggis
Peungkeur ngagempur ni teuas
Nyaan gé bati lumengis
Geumpeur pacampur jeung waas
Kadang mah diulas-ulas
Témpo bitu kalah bablas
Sétan mah seuri mupuas
Nempo kitu mah baluas
Basa semu ngacung-ngacung
Hadéan beuki melentung
Harta anu ngagugunung
Pakéan duit satangtung
Dilelebah ka kuluwung
Ni kalah jadi padungdung
Ngan maké boéh asiwung
Ditambah kai jeung padung
Rada geunyal mun geus asup
Dijajal éstu nyulusup
Lawang amal geus ditutup
Hanjakal keur waktu hirup
Geuningan menjul lancingan
Ngareunah mun dirabaan
Paingan rosul ngélingan
Dunya mah pangumbaraan
Ditendet rada lilaan
Emoy jadi ngabadagan
Naha bet kamalinaan
Tonggoy henteu nyubadanan
Nu nangkring beueus ka sirah
Keur melentung mun kajamah
Duh geuning enggeus nyangkorah
Rup ku padung rap ku lemah
Érék nyedek ka nu ngeunah
Diulas kulimis basah
Poék rupek jeung tugenah
Ngarumas nunggelis susah
Karasa mun kakucuran
Kana lancing ngajegangan
Rék saha anu maturan
Geusan cicing babarengan
Rada telat nu di luhur
Nangkring calik kalah nyembur
Mana sobat mana dulur
Geuning baralik ka lembur
Nu kakucuran ni kabur
Ka pawon terus ka sumur
Henteu maturan di kubur
Sumawon nambahan umur
Badé nyoba rada nangkring
Sina ngait lawang pingping
Ogé harta banda kuring
Nu dipuhit beurang peuting
Sigana komo mun kuring
Ayeuna rada melengking
Cik mana boro téh teuing
Cik mana anu ngadéking
Kuring ayeuna mah miring
Nu geunyal geuwat dicangking
Geuning geus kieu mah kuring
Hanjakal kaliwat saking
Nu nolol sigana geunyal
Sigana kudu dioral
Teu getol sadia amal
Di dunya nafsu diobral
Nu geunyal tadi dicekel
Gurinjal samutut kembung
Ngan amal nu jadi bekel
Hanjakal nurut ka embung
Harita anu melentung
Teu nyana ni matak giung
Ngan harta nu digugulung
Ayeuna geuning kaduhung
Nyarandé nyandar katindih
Ni buncelik rada lirih
Naon gé panyinglar sedih
Ati ceurik nyata peurih
Nyaan ni kacida matih
Katambah ngabanting nurih
Nahan ku cimata getih
Harta mah geuning teu nolih
Na liang aya nu ngudat
Nu beulah ni siga babat
Teu kurang nu nganaséhat
Engges ulah rék sasambat
Rasana peureus sabuat
Diteken gugurinjalan
Teu guna enggeus kaliwat
Tong hantem hahanjakalan
Waktu longkrang diselingan
Padungdung kokorondangan
Pan teu kurang nu ngélingan
Pék tanggung jawab sorangan
Ngaraba teras ngoconan
Dirampa rada ngageungan
Geura jawab panakonan
Mun bisa bagja nyarengan.
Kidungna kawih pamikat
Ni urup sampulur hébat
Dudunya sing leuwih giat
Lir hirup saumur jagat
Ni éndah rajah panguat
Kawawa milu kagugat
Ibadah ulah rék pegat
Lir nyawa isuk paragat
