Ku : Nyai Ating
EUNTEUP SAKICEUP
Lebah hihideung panon
Aya kolaseu panineungan
Mangsa kaeunteupan tresna
Dina waktu anu ngan sakiceup
Sajongjongan, ngulampreng kana tiap kolaseu
Urang kungsi nyacapkeun kangen
Nyungsi wanci, kanjat tina pangsarean séwang-séwangan
Muru pangreureuhan, saharitaeun
Majalaya, 25062021
WÉRA
Aya nu teu biasa
Pamuluna alum tan cahaya
Padahal giwangkara caang béngras
Horéng aya nu nyongkab sajeroeun dadana
Leungit imut maneuh dina pameunteu
Kasaput méga kahuru wéra
Majalaya, juru pangkeng, 02032021
NU NYAWANG JAGA
Nunggelis dina dunya nu hurung-hérang
Teu karasa éndahna dina saban rénghapan
Lain, lain éta nu dipikahayang
Semet seuri bungah seubeuh beuteung bari gogonjakan
Iraha kagenahan bakal datang?
Tunya-tanya ka tiap saban-saban
Angin-angin nyelecep dina wanci nyedek tumorék
Ukur bisa ngarahuh taya tangan pangawasa
Geus béak mangsa ngaroncé angkrék-angkrék
Nungtut muguran dina jarak unggal dasa
Haté rumegog nyanghareupan alam poék
Éndong kosong keur bekel jaga mun geus dihiap ku nu Kawasa
Majalaya, 030520022
Biodata anu nulis;
Nyai Ating, gumelar ampir 37 taun katukang dina ping 16 April 1985. Heubeul matuh di kota, ayeuna nganjrek di Désa Néglasari Kacamatan Ibun Kabupatén Bandung. Wanoja anu teu elat aktip dina rupa-rupa kagiatan ieu téh geus sababaraha taun ancrub diajar dina dunia sastra Sunda. Mimitina aub dina grup-grup pésbuk kayaning FBS, CPBS, KJC, Pustaka Sunda, Sumedang Bersastra, SCS, laju diaping ku sababaraha pangarang kahot. Sababaraha karyana kungsi medal dina média citak saperti majalah Sunda Manglé jeung koran Galamedia.
