JERUK PANAS BUATAN SI AKI
Geus gerak jalan harita téh capé, mumet jeung hanaang.
Duaan jeung Ki Sobat ngabaso.
“Naon ngaleueutna, Néng?”
“Ah jeruk panas waé, Ki, méh teu jadi gendut deui.”
Kaciri Si Aki rada ngahuleng.
“Aki, gak pake lama nya!”
“Siap, Néng.”
Baso geus rék béak jeruk panas can kénéh datang.
“Ki, mana jeruk pan…,” teu kebat. Bari dodongkoan Si Aki kaburu nyampeurkeun mawa mangkok nu eusina dua jeruk meunang ngulub. Kuring kerung.
“Hapunten rada lami, sesah panasna margi jerukna tina kulkas.”
***
TUMIS KICIWIS
“Cuang nyoba tumis favorit Saung Tepis Wiring, yu.”
“Naon anu sepesialna?”
“Pokona mah dijamin lalagiheun lah, rupa teu pati menarik, ngan palebah rasa …,” Mira ngacungkeun jempol leungeun katuhu bari ngiceup sabeulah.
Barang gék diuk gé geus kurunyung nu nawarkeun menu masakan. Manéhna nu mangmilihkeun.
Teu kungsi lila pesenan geus datang, kadaharan lengkep. Sangu dina boboko leutik, asin sepat gedé, tahu, témpé, kabéh digoréng, kurupuk jeung sambel, teu maké lalab.
“Ieu nu dijagokeun téh nya? Asa kakara manggihan daun sarupa cosin ngan heuras,” Bari dialak-ilik.
“Nya, tumis kiciwis.”
Gebeg. Sumpahna gé karék nyaho rupa kiciwis nu sabenerna. Sakanyaho mah sabangsaning jurig leutik, nu ngagedéan lamun katajong.
Sajeroning ngahuleng, teu burung ngahuap. Bener ngeunah. Kuring nyelebek.
Sabot jongjon ngahuap, Si Mira euleugeug bari molotot, curukna ti ngacir-ngacir waé.
“Éta, éta … eu … ‘na biwir manéh.”
Ku Kuring dijiwir bari diilikan, laju dihuapkepkeun. “Hileud … hileud … jurig. Hileuuud.”
Atuh katempuhan jadi mangmayarkeun.
***
Grup Fikmin Basa Sunda(FBS)
Biodata fikminer:
Téh Éndang Kurniasari anu gumelar di Bandung ping 20 Januari 1967 ieu téh salahsawios fikminer anu loyal di grup FBS. Anjeunna netep di Dusun Cukanggaleuh Désa Cisurat Kecamatan Wado, Sumedang. Ngawulang di SMPN1 Darmaraja Sumedang ti sasih Maret taun 1989.
