Mang Wawan sababaraha kali tanggah ka luhur, bari jeung ngarenghap semu anu beurat rék nyarita.
“Hatur uninga ka sadayana, saleresna mah sanés kieu kajantenan anu dipiharep ku urang sadayana. Mung dalah kumaha geuning waktu teu tiasa nungguan, sangkan sadayana tiasa sampurna.” Mang Wawan ngamimitian nyarita.
“Ieu Ma Lela, ibuna Velin, raka pituin Abdi, ari ramana Velin mah parantos ngantunkeun waktos Velin yuswa sapuluh taun.
Ibuna Velin nikah deui ka Mardi, waktos yuswa Velin genep belas taun.”
“Saleresna mah ieu téh aib keluarga , namung kalah kumaha ogé kedah dipungkas, ngarah jelas sareng mudah-mudahan aya jalan anu saé kanggo urang sadayana.”
“Dina hiji dinten, anu teu dipiharep, waktos ibuna Velin angkat ka sérang, Velin digadabah ku Mardi. Dugikeun ka Velin kakandungan. Mardi kabur teu tanggung waler ninggalkeun Velin sareng ibuna anu dina kaayaan Velin kakandungan. Mardi parantos ngantunkeun lima taun kapengker, abdi gé kénging wartos ti wargina.”
“Ieu Dani, putra Velin ti Mardi,” ceuk Mang Wawan bari ngusap tonggong Dani anu tungkul.
“Saparantos Velin ngalahirkeun Dani, Velin miceun diri, angkat tebih, ku lantaran janten catur jalmi salembur.”
“Tah ayeuna tos kawaler kunaon sababna Velin teu kersa sababaraha kali dilamar ku hidep, Den fadhil. Sabab Velin ngaraos trauma sareng teu sampurna kanggo nyarengan kahirupan rumah tangga sareng salira. Matakna Velin usaha nyalira, salami rumah tangga sareng Anjeun, kanggo nyekapan kabutuhan Dani ti orok dugikeun ka sakolana. Sapésér ogé teu nganggo artos salira, Dén fadhil. Ku kituna mugi ieu janten jeujeur carios anu tiasa katampi kusadayana, kalayan jelas écés teu aya rusiah anu disumputkeun deui” Mang Wawan nutup carita.
“Papah .., mangga ayeuna Mamah nyanggakeun sadaya-daya, badé taat kana sadayana kaputusan Papah. Bujeng badé dipirak, sanajan bade dicacag diwalang-walang gé, Mamah rido lillahitaala.” ceuk Velin bari nginghak.
“Hapunten Mamah tos kumawantun nambut artos papah dua puluh juta sareng nganggo kartu kredit papah tilu juta, teu aya sanés kanggo ngamodalan Dani usaha ojég online. Kumargi salulusna sakola, Dani teu acan kénging padamelan. Lumayan wé atuh kanggo sadidinten Dani sareng Ema. Kumargi artos Mamah masih kénéh di laluar, nembé aya sapuluh juta, mangga bilih badé dicandak mah. Tong sieun da Mamah gé bakal ngalunasan sadaya sametan Mamah ka Papah. Mangga geura waler, Papah,” ceuk Velin pasrah.
Kawas kapuk kacaian, awak kuring leuleus narima kanyataan nu aya di hareupeun. Asa ditipu, asa dibobodo, peurih, nyeri, ambek jadi hiji. Biwir asa dikonci, létah asa heuras, hésé rék nyarita, ukur bisa ngarénghap jero, beurat karasana dina hate. Kuring ngalieuk ka Umi, Umi teu nyarita, ngan katempona kawas anu bisa maca naon anu karasa dina haté kuring. Umi nyampeurkeun bari ngais Tiara, incu kanyaahna.
“Fadhil, Kasép, anak Umi, Umi nyaho anjeun nyeri, Umi ngarti haté anjeun peurih. Sing percaya, Umi bakal aya di satukangeun hidep. Tapi, Umi rék ngélingan ka hidep, lamun jadi jelema tong égois. Bayangkeun lamun Anjeun aya di posisi Velin, naha Anjeun sanggup jadi Velin ?”
“Lima belas taun Velin maturan hidep rumah tangga, méré kasenangan, méré kabagjaan ku lahirna Tiara anu jadi incu kanyaah Umi, incu anu jadi impian Umi. Sedeng Velin teu kungsi sapoé ogé ngurus Dani, ti orok nepi ka déwasa. Velin tegesning ukur ngabakti ka Anjeun anu jadi salakina. Naha Anjeun sanggup hirup jauh ti kolot, bari welasan taun teu kungsi panggih, teu nyaho rupa anak sorangan? Naha Anjeun sanggup miceun kasono, maehan kangen ka nu jadi indung jeung anak salila lima belas taun?”
“Fadhil bageur, anak Umi, baheula Anjeun keukeuh pageuh, hayang ka Velin embung kanu lian, malah Anjeun nepikeun ka kagegeringan ditinggalkeun ku Velin. Velin ogé anu nyambung méré sumanget pikeun hirup Anjeun, nepikeun ka Anjeun cageur bageur nepi ka kiwari. Kasép, anak Umi, pék ayeuna geura wakca, balaka, jalan mana anu rék dipilih ku hidep. Sing percaya, Umi bakal aya maturan kana kaputusan anjeun.”
Tiis, nyelecep kana haté, seneu amarah anu ngagedur dina haté pareum saharita. Kuring ngagabrug Velin jeung Dani.
“Astagfirulloh haladzim. Demi Alloh, hapunten Papah nya, Mah, parantos suudzon ka Mamah. Can tangtu Papah bisa siga Mamah.”
“Dani, kasép, ieu Papah. Papah Anjeun, anu bakal mikanyaaah ka Anjeun. Itu Tiara adi anjeun, Kasep. Hampura Papah anu salah sangka. Hayu bageur, hirup bareng ngariung di dieu, di bumi ieu jeung Mamah ogé Papah. Keun masalah pagawéan mah tong sieun, Anjeun teu kudu ripuh ngojég. Hayu énjing ngiring sareng Papah, damel di perusahaan tempat damel Papah. Kin ku Papah ditempatkeun dina posisi anu sakirana Dani mampuh.”
Alhamdulillah hirobill allamin, ya Alloh, dinten ieu abdi dipaparinan deui rijki. Mangrupi putra pameget anu langkung nyampurnakeun kabagjaan rumah tanggi abdi.
Hatur nuhun Ya Alloh, Kuring sujud syukur disaksian ku sakur anu aya di dinya. Kabéh nu aya suka bungah malah aya nu ngaluarkeun cimata bagja.
TAMAT
Sakitu anu kapihatur, kirang langkungna ulah kirang-kirang ngahapunten.
Hayu urang ngamumule basa sunda !!!
URANG SUNDA HÉBAT !!!
Wassalam,
MF, Agustus 2018
