Fikmin-fikmin karya Cucu Unisah
KALAKAY MUNTANG
Kalakay ngaplék ‘na tungtung dahan leutik. Taya pangawasa. Lungsè. Leuseuh diwuwuh sarwaning bangbaluh.
“Pagoda, pagoda pangmukakeun lawang angin!” Gorowok mangandeuh nu napel ‘na puhu dahan. Cakakak pucuk-pucuk ngèmploh nyaleungseurikeun. Séor angin nyuruwuk. Kalayang. Kalakay ngolèang. Séah dangdaunan sarurak, ngan daun konéng nu gugupay bangun teunangan. Peng. Kalakay kabawa ngawang-ngawang. Haténa lewang nyawang legana jagat, gimir nilik wiati. Rét ka handap, lenyap!
Sora angin nu handaruan, teu lila ngajauhan. Kalakay méh ragrag lalaunan. Ber, kalayang deui. Reup manéhna peureum. Pasrah, sadrah kana kaayaan.
“Emh Gusti, mangga nyanggakeun sadaya-daya,” gerentesna. Batu, cai, taneuh, raranggah. Kalakay museurkeun lelembutan. Hayang muntang, nya ka mana? Treup eunteup ‘na pangpung garing. Mun kongang mah meredih, tong teuing waka ngalemah. Rumasa. Asa tacan cukup pibekeleunana.
KURING JEUNG ANJEUN
Mobil ngageuleuyeung ka buruan villa. Katémbong aya awéwé geulis diuk nyangsaya gigireun Anjeun. Di lapang golf, salah saurang cady nu rancunit buru-buru ganti baju. Les ngiles jeung Ferrari Anjeun.
Dina acara salah sahiji acara talk show di TV. Anjeun dibatik Asmat kelir bulao meunang milih kuring. Sababaraha kali Anjeun seuri bari unggeuk ka reporter nu ngadaun seureuh. Acara lekasan, Anjeun duaan ngaleungit teuing kamana.
Tadi isuk potrét Anjeun nyepeng étém bari ngulangkeun paré aya dina koran, tabloid, jeung média online. Lian ti sabaraha urang pejabat nu marengan, awéwé keureutan India geus anjeucleu nungguan dina Lamborghini Anjeun.
Cenah, peuting ieu Anjeun rék kunjungan kerja ka luar pulo teuing jeung saha boa. Salila dahar udang saos mantéga buatan kuring, Anjeun maling rérét siga nu terus rasa. Waktu nyium embun-embunan rék amitan, karasa awak Anjeun cembrék. Rasa percaya kuring geus ledis dileguk ku Anjeun dina jus jeruk lémon jeung sasendok arsén.
KDRT
“Mamah… jangan!” Si Bungsu ngajorowok tarik pisan. Beletak-beletak! Gagang sapu ninggang huluna. Sajeroning neunggeulan, panon disipitkeun. Teu téga mèmang, tapi da dikumaha deui, itung-itung ngawarah. Sok pusing atuda mun geus ciling cingcat. Leuheung mun keur euweuh sasaha sabodo teuing. Éta geura mun pareng keur aya sémah matak ngérakeun.
Nu jojorowokan teu didéngè, leungeun rikat ngadongkang kana palu leutik. Bug, bug, bug kana tonggongna. Rasa keuheul geus teu ka ampeu. Hayang puas ngarah kapokeun. Tadi isuk geura, teu nginjem panon. Hareupeun pisan nyokot dahareun kotka dikukud teu ngari.
“Mamah, udah…!” Teu ditolih sanajan jantung ngageder, awak ngadég-dég. Saumur nyunyuhun sirah kakara ngalakukeun siga kieu. Nu diteunggeulan ngalempréh, panonna ceuleuyeu. Karérét gigiren rak piring aya pacul. Gap disimpen luhureun nu geus teu walakaya. Lalaunan ditincak, ‘krek’ puas siah! Teu ngarumasakeun diri pisan tuda! Geus puguh asup kana sentég, der rék kabur, ugal-ugil hayang leupas. Naon? Rék ngagégélan kabel deui? Meunyi.
***
Ngeunaan Fikminer:
Cucu Unisah, lahir di Bandung 3 Maret 1971, padumukan ayeuna di hiji mumunggang pasir wewengkon Cimenyan. Aktif di komunitas FPBS, Sirung Patrem, Pustaka Sunda. Babarengan sareng Kang Yusef miwah Kang Diro Aritonang ngadegkeun komunitas Haiku-Ku lndonesia. Pangurus GLN Kota Bandung. Redaktur Majalah sakola Sensasi Soka. Wanoja nu mancén di SDN 035 Soka Kota Bandung. Pangaresep kana nyerat ti kawit SMP, resep traveling sareng hahaleuangan. Mikawanoh, mikacinta murangkalih jantenkeun jalan ngempelkeun tur ngabimbing murid asuhanana sangkan resep maca jeung nulis. Cita-cita wanoja nu resep coklat téh nyaéta ngagaduhan pabukon alit pikeun ngeusian waktos pami jaga tos pangsiun. Tujuanana taya lian ngaliarkeun virus ka murangkalih khususna di lingkunganana sangkan micinta dunya literasi jeung seni.
Alamat émail : cucuunisah71@gmail.com
