Yasana: Agus Sugianto
Naon atuh anu bisa jadi cukang lantaran lamun hayang ngantengkeun katineung ka Apa? Ari ka pajaratanana tangtu kudu ngingkig ka lembur. Sedengkeun keur usum sasalad kieu.
“Ambéh hidep henteu pati katutuluyan kaleungitan,” saur Uwa.
Ngoréhan parasagén sugan aya potrét heubeul rék digedékeun ka tukang gambar.
“Alit teuing foto KTP mah, A.” Tukang gambar nyéréngéh.
Nempo conto jeung lukisan pesenan ngajajar disarandékeun, ras inget kana méja di ruang tamu. Méja pendék tina kai mahoni paranti Apa nunda koléksi buku. Ngamotivasi ti dituna mah meureun, sangkan kuring sadudulur jadi resep maca.
“Diical ku Tétéh.” Ema nuduhkeun ku gado. Satengah dilelekan Tétéh henteu wakca naon pangna méja dijual. Piraku butuh keur jajan onaman? Barina ogé pangaji sabaraha mun enya téh.
“Kasuat-suat si Tétéh téh. Sahenteuna pastina, unggal aya anu ngajadikeun ka adi-adina, prosésina téh apanan dilaksanakeun dina méja éta.” Uwa neureuy ciduh. “Teu sangka si Tétéh rék lawas léléngohan. Padahal rupa teu nguyang.”
Grup FB Fikmin Basa Sunda
29/7/2021
Biodata Anu Nulis:
Kang Agus Sugianto, fikminer anu nganjrek di Cirebon ieu téh tapis pisan dina ngaréka carita. Rata-rata karya seratna ogé leubeut ku ‘pesan moral’. Numawi teu héran upami anjeunna dileler hadiah ku LBSS dina raraga ngareuah-reuah miéling Poé Basa Indung Sa-dunya sasih Pébruari taun 2022. Fikminna karyana janten piunggul utama.
