LUMPAT
Yasana: AndrieKW
Teu pira ukur ngajlengan pot leutik, suku kènca geus dua bulan teu walakaya. Pas kajadian mah teu dirasa, kalah ka ngadon indit nedunan tugas, muru kuya ka tungtung dunya. Isukna dipariksa ka rumah sakit.
“Tah ieu gambarna Jang, tulangna potong seukeut kaditu kadieu, kudu gancang dioprasi” Sora dokter handaruan, panon olohok nempokeun gambar, teu lila titingalian karonèng, poèk wèh.
Pas hudang geus ngagolèr, di riung ku lobaan. Aya nu nyekel ragaji, ogè palu jeung gègèp, kaciri beungeutna galeumpeur.
Uing rikat luncat, lumpat notog-notogkeun manèh bari gogorowokan, “Naha teu bèbèja rèk ngoprasi tèèèh!!!”
“Kunaon aa èta, teu pupuguh hudang, lumpat bari gogorowokan, boa boa…”
“Keun wè, ayeuna mah urang nungguan nasib Jang Ibro nu keur dipariksa.” Sora mandor bangunan neger-negerkeun manèh, sanggeus tadi aya musibah wangunan runtuh di ruang administrasi rumah sakit nu keur di omèan ku pagawèna.
Uing humarurung di peuntaseun rumah sakit, ngalungsar bari ngararasakeun suku nu beuki nyanyautan.
***
Grup FB Fiksimini Basa Sunda 20/03/2022
DINA LILIUH CINTA
Yasana: Nasrul Jatnika
Cinta ka anjeun mah ngayas. Kumalayang. Ngondang rasa ngotrétkeun sajak. Ngareimbeuyan haroshos rosa, najan dina mongkléng peuting. Ngalahirkeun hahaneut mangsa ngecrek ngijih. Anjeun ogé surti. Mairan ku galura tresna. Ngeukeupan cinta Zulaikha ka Yusup. Béda deui jeung anjeun. Nu mukakeun hakékat cinta. Rosana cinta dina tanggung jawab. Yén tresna urang lain sapoéeun. Mayeng, malah parat tepi kampung ahérat. Dina waktu-waktu mustari doa mustajab. Maké gerentes pangawulaan dumasar ibadah. Munjulkeun kalalakian kuring. Naha bisa dua rasa nu béda mawa kana katingtriman? Naha bisa tilu jelema dihijikeun dina jatukrami nu pageuh, répéh-rapih, sakinah mawadah warohmah?
“Kang, ieu candak kanggo Tétéh. Geuning minggu kamari basa ka dieu, resepeun pisan.” Kuring nampanan wadah black forest. Poé ieu giliran ka ditu.
“Mani raos kuéh téh. Sigana dijieun tina cinta munggaran ieu mah.” Si Tétéh imut.
“Ké, rek ditelepon Si Ayi, cuang heureuyan.” Kusiwel ngaluarkeun telepon. Uplek ngobrol. Sakapeung diselang saleuseurian. Karasa deudeuh Si Tétéh jeung hurmatna Si Ayi.
***
Grup FB Fiksimini Basa Sunda(heubeul), média citak Galamedia.
