TIWAS
Kelas katingker jempling.
“SMKN Gilingwesi nu boborot téh, nya? Standar Pembiayaan jeung Standar Sarpras ukur dua-tilu? Haduuuh…!” Jol aya sora nu ngagaur.
Teu lila karasa aya nu nepak kana taktak. Dilieuk, angger pengawas éta kénéh. Sorana bet robah wanda jadi semu nyekroh.
“Tapi kétang jujur, alus!” Pamindingna ukur seuri maur.
“Saha heula atuh operatorna.” Pa Abdul nu nyempod gigireun laju keprok bangun nu suka. Nu séjén milu narurutan.
Di pojok beulah kénca, katempo Si Kelét ogé milu seuri maur.
Seurina nerus narutus ngumalangkang waé dina kaca spion. Komo mun pareng kaendagkeun. Dibarung ku haréwos nu ditompokeun; “Ari sakola abdi kumaha nya, A?”
Reg. Motor dieureunkeun. Karasa aya nu nga-WA. Bérébét. Japri link ti koordinator. Cenah mah tiwas. Ti pengawas. Béréndél excel dipapay imeut pisan. Palebah standar nu dua éta. Har, geuning jadi genep-genep? Nahnay nakeranan. Pagawéan sabulan campleng jeung guru-guru jalujur katut barudak nu saruhud, horéng geus ruksak burakrakan.
Grup FB Fikmin Basa Sunda 19062021
***
MOON ADMIRER
“Cios ngabungbang téh?”
“Nya tulus atuh.”
“Ramé teu?”
“Puguh wé.”
“Aya saha waé?”
“Loba. Aya urang Tasik, Bandung, Garut…”
“Urang Sumedang ogé aya?”
“Naon atuh bet tatanya waé? Lain mah miluan ngariung di dieu.”
“Aya nya?”
“Ka dieu wé atuh. Méh kasaksian ku sorangan. Ukur nanggap dongéng mah moal ramé.”
“Meni somseu, ih. Baeud yeuh…”
“Kumaha?”
“Teu, ah…”
Jempling. Peuting beuki ngalungkawing. Silalatu tingalangsrod numpakan peteng.
Bray, méga nyinglar. Haté beuki kelar. Halimun nyimbutan. Manglambar-lambar. Héab. Hawa haneut ngalalar.
“Isin ah, badé ka dinya téh…”
Layar ukur dirérét. Horéam némpas deui.
“Piraku bulan ragrag kana lahunan. Inggis éar pajagatan.” Bérébét téh.
Ambekan beuki ngaregéh.
Pleng. Nu moncorong kawas keur ngahuhuleng.
“Ngaganggu nya? Punten atuh. See you…”
Karep mah ngahulag. Ngan sora nu maca fikmin mimiti patingkocéak.
Reup, langit moékan. Euweuh nu ngempray euweuh nu gugupay.
“Héy, ka mana? Sok pundungan nya!”
Kosong euweuh walonan. Ukur émot bulan nu cipruk cimataan.
Grup FB Fikmin Basa Sunda 28042019
***
Ngeunaan Fikminer:
Asep Komara, gumelar di Subang ping 17 Oktober taun 1977. Dumuk di Sukamekar, Desa Cigadung, Kecamata Subang. Dibenum di SMKN 1 Subang ngawitan taun ayeuna. Kawitna mah ngajar Matematika SMKN 1 Patokbeusi, sami di Kabupaten Subang.
