Yasana: Iis Firda Aulia
Haseup mulek, matak peurih kana panon. Di mana-mana nu ngageberan saté, balakécrakan suka bungah.
Ras ka manéh nu kamari amitan.
“Wayahna engké mah méakkeun soré téh moal bisa ‘na tonggong uing deui.”
“Naha? Moal diabur deui di tegalan nyah?”
“Lain, isukan mah apan rék ka sawarga…. ”
Emh, bagja. Jadi sato tunggangan di sawarga.
Geleber ngajauhan. Néangan pangeunteupan nu hawana hégar. Sabenerna mah ngalelerkeun haté nu manteng waé ka manéh.
Teup ‘na suhunan saung leutik di sisi lembur.
“Ma, lapar,” sora nu ngarenghik.
“Tungguan Bapa hidep, keudeung deui gé datang geura.”
“Ah mani lami, ti kamari teu mulih waé.”
Geleber ngadeukeutan jandela. Katempo budak awéwé salapan taunan keur ngusapan beuteungna. Indungna ukur ngaheruk.
Trok… Trok…. pamatuk ngahaja macokan kusén jandéla nu geus béak ku rinyuh.
Budak jeung indungna ngalieuk.
Geuwat muragkeun manéh.
“Maaa… aya manuk murag!”
“Alhamdulillah!”
Kadéngé nu lalumpatan ngadareukeutan.
Reup panon dipeureumkeun. Ihlas.
*
Grup FB Fikmin Basa Sunda, 24/7/2021
Biodata anu nulis:
Bu Guru nan super bageur anu ngawulang di SMK Bhakti Praja Purwakarta, kalahiran Purwakarta 25 Juli 1977. Anjeunna lebet janten anggota grup pésbuk FBS(Fikmin Basa Sunda) ti 8 Pébuari 2016. Tos nyerat ti ngawitan 2010. Carpon munggaran anjeunna, “Cinta jeung Satia” dimuat di majalah Sunda Manglé. Di FBS kantos kénging Piala Rucita salaku Penulis Script Naskah Adaptasi Terbaik ping 5 Desember 2018. Kantos Pinunjul ka-3 panulis réportaseu “FBS Sakentel Espresso”, 25 Mei 2018.
