CATETAN MÉMÉH BALIK
(Tatang Sumarsono)
keur dicatet-catetkeun
sakur nu kudu ditedunan
bisi isuk atawa minggu hareup
nohonan panyaur aya nu nyampeur
taureun ka koperasi opat bulan deui
ka warung Entur urut ududeun
jangji nyumbang ka masigit
BPJS nu remen ditagih
kudu dicumponan heula
pan matak jadi kabeungbeurat
anak-minantu katempuhan mayar
mun tacan lunas bisi taya nu nyalatan
méméh mulang sabab tepi kana subaya
nya hayang hampang-himping heula
hampura ka sakur dulur-baraya
rumasa kuring loba dosa
hanas loba nu amis jangji
taya bukti da parohoeun deui
atawa dipopohokeun da geus jaradi
ah rék dianggap bérés, cukup ku inna lillahi
***
TATANG SUMARSONO. Dilahirkeun di Tasikmalaya, tanggal 25 Januari 1956. Alumni SDN 5 Galunggung, Tasikmalaya, taun 1968. Kungsi sakola di SMPN 3, SMEAN (teu tamat), jeung SMAN 2, di Tasikmalaya. Neruskeun kuliah ka IKIP Bandung, Jurusan Pendidikan Bahasa dan Sastra Sunda (lulus 1982, di-black list ku pamaréntah, alatan jadi bagian tina démo mahasiswa 1977/1978 anu ngoréksi Ordeu Baru).
Pacabakanana anu utama jadi wartawan, ti taun 1975. Boh di Bandung boh di Jakarta. Ayeuna cekel gawé jadi anggota rédaksi Manglé, jeung jadi Staf Khusus Bidang Budaya Rektor Unpas. Lian ti éta jadi fotografer deuih. Kungsi ngadosénan di FISIP jeung di Fakultas Hukum Unpas. Taun ieu, dihiap pikeun jadi tanaga ahli di Pusat Pembinaan dan Pengembangan Bahasa.
Karangan jeung karya fotona nyebar dina rupa-rupa média. Naskahna anu geus medal jadi buku aya 66 judul (ngawengku fiksi, biografi, pangajaran, jeung pedaran umum lianna).
Kungsi dilélér Hadiah Jurnalistik pikeun karya fotona, taun 1984). Kungsi dilélér Hadiah Sastra Rancagé (1993 jeung 2002), Hadiah Sastra Samsudi, Hadiah Sastra LBSS, jeung Hadiah Sastra DK Ardiwinata,
Dina widang organisasi, Tatang digedékeun di Pelajar Islam Indonesia (PII). Lian ti éta, jadi anggota PWI, Paguron Silat Mandéraga, jeung Paguyuban Pasundan. Kiwari jadi pangurus Persatuan Olahraga Berkuda Seluruh Indonesia (Pordasi) Jawa Barat. Karesepna moro jeung naék gunung.