Alun-alun pinuh ku jalma. Kabéh ngalagar pakarang. Sabedogna-sabedogna. Bandéra perang ngélébét. Ngaguruh. Sora-sora nu ngancam.
“Tuar, tuar!”
Nu rék bajoang ngaleut. Tatabeuhan. Eundeur, ngageder.
“Podaran! Podaran, tuman!”
Cenah bongan aya abdi dalem kumawani. Ngahina salah sahiji anak nagari. Rahayat bijil sihungna. Teu narima dicacampah. Ngagurat bumi kedal sumpah.
Brul ti kidul, jol ti kalér. Ti kulon jeung wétan ogé daratang. Ngajorag puseur dayeuh. Istana pada malédogan, “Turun! Turun siah!”
Karajaan ngadadak geunjleung. Simpay ampir rék pegat, tatapakan kaoyag-oyag.
Kadéséh, ponggawa nyingkah, prajurit nyarisi. Sebér ku tanaga rahayat. Rosa lain lawaneun, butuh taktik pulitik.
Di paséban. Raja kalih Patih ngahiul. Bingung laku ngayonan nu bendu. Laju rerencepan gempungan. Disaksian para abdi dalem. Bababalagempagan néangan cara. Sangkan nu amarah teu motah. Répéh rapih sasarina.
Raja ogé ngangkir Mantri, nu kamari nyieun pucuk ti girang. Kacalétot omong nandangan wirang. Akibatna hareupeun mata. Nu démo ti mamana.
Ki Patih méré kamandang, sangkan Raja ngabagikeun amplop. Mantri gancang nyarita, dina podium ménta dihampura. Teu sakara-kara, nu récét répéh, sanggeus dijejelan récéh.
Raja, Patih, Mantri jeung baladna barungah. Nu sahéng téh tiis deui. Peutingna ngayakeun pésta. Tuak jeung anggur beureum dioplos saté bugang. Bau hangru sarohangan. Inumeun jeung opieun ngabarak dina méja kasarakahan. (*)
Bali, 03/02/22
Ngeunaan pangarang:
Muzahidin Noor, lahir di Ciamis, 07 Juli 1976. Diajar nulis jeung maca mah ti keur SD, mimiti resep nulis taun 2018. Sababaraha karyana kantos dimuat di médcét sareng online. Sapopoéna kuli di PT Prima Larvae Bali.
Akun FB/IG : Muzahidin Noor
