KEUR ANJEUN
Ngotrét sajak keur anjeun
Nalika hujan turun dina tungtung poé
Guluyurna maseuhan haté nu peunggas ditilas tineung
Dahan-dahan mimiti sirungan deui
Ngotrét sajak keur anjeun
Saban peteng teu bisa tumaninah saré
Aya ringkang nu teu eureun ngaririwaan, mawa rasa keueung
Mangsa paanggang diri
Ngotrét sajak keur anjeun
Sanajan ukur basa nu basajan baé
Kecap-kecap dumadakan hideng lindeuk
Mapalérkeun rasa marudah ati
Ngotrét sajak keur anjeun
Manawi kasurti, inggis haté ukur nyabeulah
Tepis Wiring, 04052022
Sajak Dichtison
ASMARA DI AMBARA
Ngampar bodas caang béngras
Nganteur haté nu keur ngayas
Nuturkeun kahayang urang
Ulin dina poé panjang
Uplek nyacapkeun sono
Kana waktu ampir poho
Diri nu keur gandrung
Teu elat sono patepung
Sabot ngobrol ngalér ngidul
Haté teu bisa ngawadul
Americano di hareupeun
Mapaés long black nu anjeun
Leleb anteb neuteup pameunteu
Haté ragrag teu ku hanteu
Kumaha mayunan jaga
Pama tepung deui jeung salira
Tepis Wiring, 04052022
