Fikmin Basa Sunda
Ku: Abdul Haris
Panonpoé dikerewek, dibebeskeun kana karung goni lecek. Ocal-ocal diperekpek, maké tihang listrik dadakan ngarabut. “Hor itu aii Aka, atuh poék, say..?” pok anu dipiangenna. Orokaya, samalah mah beuki jigrah ngagempuran eusi karung.
“Keur engké peuting, sangkan aing teu panggih deui jeung simpé…!” cenah. “Apanan nong aya sagédéngeun anjeun, minangkana caricangkas atanapi gaang ngoncrang,” gerendengna.
Teu talangké, bubuk srangéngé lajuna disawérkeun. “Euweuh deui cara, ‘nong..!” wur. Mancawura ‘na mangsa sareureuh kolot. Atuh peuting jadi ngempray salawasna, bulan jeung béntang ngalacir ngahiyang ka mana boa, marcapada ogénan jadi gumuruh teu aya pisan towongna. Harénghéng ku alak cangra, nu lain dina wayahna.
Wanci lima waktu ajangeun menekung, jadi suwung. Anggot dua pertilu dina wengina. Deker-deker jurus nonggoy nambulan haliah dunya, paselang jeung ngéak-ngéngklak tepi ka jadi tangkorak. Ilang mangsa jangeun tibra… lami-lami mah bosen barung kaduhung, teu bisa mulangkeun deui giwangkara ka asalna.
***
Grup Facebook Fiksimini Basa Sunda 2020
